Vetrar - og jetlagsmorgun

Jólahýrurin er í topp og av tí, at mín ferð og mín dagur í gjár byrjaðu kl. kvart í fýra (ja, um náttina) var eg somikið sorlað í gjár, at eg fór í song 19.30. Tað hevði eisini við, at eg vaknaði av mær sjálvari vælúthvíld kl. 7 í morgun. Veit ikki, um eg nakrantíð eri farin so tíðliga upp av mær sjálvari ein frídag. Kl. 9.30 hevði eg vaskað klæðir, hongt eina maskinu upp, vaska upp frá í gjár, elta bollarnar at ganga og sat við einum temunni klár til at byrja uppgávuskriving. Tað er altso nakað, eg fari at royna aftur onkuntíð, tí eg havi fingið so nógv burtur úr degnum.

Uppskriftin til bollarnar havi eg fingið frá Anitu einaferð langt síðan og havi gjørt hana so ofta síðan, at eg dugi hana uttanat, so eg veit ikki, um hon er heilt, sum hon var tá. Men góð er hon.

Hetta skalt tú brúka til uml. 20 bollar:
3 dl lunkað vatn
1 pk ger
1 dl olju
1 tsk salt
3 spsk sukur
passaliga nógv mjøl (kanska eini 7-800 gram tilsamans)

Eg plagi at blanda grahams-, rug-, og hveitimjøl, alt eftir, hvørjar bollar eg havi hug til. Viðhvørt koyri eg onkrar kjarnir í.

Soleiðis gert tú:
Blandað lunkaða vatnið og gerina. Blanda olju, salt og sukur í eisini. Koyr eitt sindur av mjøli í í senn, til tú metir tað vera passaligt.
Lat deiggið ganga í bollanum í 30 minuttir.
Ger einar 20 bollar og lat teir ganga á plátuni í 45 minuttir. Minst til at tendra ovnin, tá teir hava gingið eitt sindur meir enn hálvan tíma.
Bakast í uml eitt korter á 175 gradum.

Vælgagnist!
Minst til at fylgja okkum á facebook!